உணவகங்கள், ஹோட்டல்கள் மற்றும் அனைத்து வகையான உணவு வணிக நிறுவனங்களிலும் துருப்பிடித்த, சேதமடைந்த அல்லது சுகாதாரத் தரமற்ற கத்திகள் மற்றும் வெட்டும் கருவிகளை பயன்படுத்தக் கூடாது என்று இந்திய உணவுப் பாதுகாப்பு மற்றும் தரநிர்ணய ஆணையம் (FSSAI) அறிவுறுத்தியுள்ளது. உணவின் தரத்தையும், பொதுமக்களின் உடல்நலப் பாதுகாப்பையும் உறுதி செய்யும் நோக்கில் இந்த நடவடிக்கை மேற்கொள்ளப்பட்டுள்ளது.
துருப்பிடித்த கத்திகளை பயன்படுத்தும்போது, அவற்றில் உள்ள இரும்புத் துகள்கள் மற்றும் நுண்ணுயிரிகள் உணவில் கலக்கும் அபாயம் இருப்பதாக நிபுணர்கள் எச்சரிக்கின்றனர். குறிப்பாக இறைச்சி, மீன், காய்கறி மற்றும் பழங்களை வெட்டும் போது துருப்பிடித்த கருவிகள் மூலம் பாக்டீரியா மற்றும் பிற நோய்க்கிருமிகள் எளிதில் பரவக்கூடும். இதனால் உணவு மாசுபட்டு, உணவு நச்சுத்தன்மை, வயிற்றுப்போக்கு, வாந்தி உள்ளிட்ட பல்வேறு உடல்நலப் பிரச்சினைகள் ஏற்படும் வாய்ப்பு அதிகரிக்கும்.
இதனைத் தவிர்க்க, உணவு தரத்திற்கு (Food Grade) ஏற்ற, துருப்பிடிக்காத எஃகால் (Stainless Steel) தயாரிக்கப்பட்ட கத்திகள், வெட்டும் பலகைகள் மற்றும் பிற சமையல் கருவிகளை மட்டுமே பயன்படுத்த வேண்டும் என ஆணையம் வலியுறுத்தியுள்ளது. மேலும், அவற்றை முறையாக சுத்தம் செய்து, கிருமி நீக்கம் செய்து பராமரிக்கவும் அறிவுறுத்தப்பட்டுள்ளது.
உணவுப் பாதுகாப்பு விதிமுறைகளை மீறும் உணவகங்கள் மற்றும் உணவு நிறுவனங்கள் மீது ஆய்வு மேற்கொள்ளப்பட்டு, தேவையான நடவடிக்கைகள் எடுக்கப்படும் என்றும் அதிகாரிகள் தெரிவித்துள்ளனர். இந்த புதிய வழிகாட்டுதல் மூலம் உணவகங்களில் சுகாதாரத் தரம் உயர்த்தப்படுவதோடு, நுகர்வோருக்கு பாதுகாப்பான மற்றும் தரமான உணவு கிடைப்பதை உறுதி செய்வதே முக்கிய நோக்கமாகும்.
About the Author
